មណ្ឌលគិរី៖ គ្រួសារមួយនៅភូមិស្រែហ៊ុយ ឃុំស្រែហ៊ុយ ស្រុកកោះញែក ខេត្តមណ្ឌលគិរី បានពុលផ្អកសាច់ជ្រូកព្រៃ បណ្តាលឱ្យស្លាប់ប្តីប្រពន្ធ២នាក់ កូន២នាក់កំពុងសង្រ្គោះបន្ទាន់ ហើយឪពុកមារម្នាក់ទៀតមានស្ថានភាពស្រាលដែលកំពុងសម្រាកព្យាបាលនៅមន្ទីរពេទ្យបង្អែកស្រុកកោះញែក។

ប្រធានមន្ទីរសុខាភិបាលខេត្តមណ្ឌលគិរី លោក ប៊ុន សួរ បានបញ្ជាក់ប្រាប់ EAC News ថាហេតុការណ៍នេះកើតឡើងនៅថ្ងៃទី១៩ ខែមីនា ឆ្នាំ២០២៤ ក្រោយពីក្រុមគ្រួសារនោះបានយកសាច់ជ្រូកព្រៃដែលទិញពីអ្នកភូមិកាលពីថ្ងៃទី១៣ ខែមីនា មកធ្វើជាផ្អក ខណៈអ្នកភូមិដទៃទៀតក៏បរិភោគដែរ តែចម្អិនធ្វើជាម្ហូប ខុសប្លែកពីគ្រួសារជនរងគ្រោះបរិភោគសាច់ឆៅដែលអាចប៉ះពាល់ដល់សុខភាពធ្ងន់ធ្ងរ។

បើតាមប្រធានមន្ទីរសុខាភិបាលខេត្តមណ្ឌលគិរី ក្រោយបរិភោគផ្អកសាច់ជ្រូករួច មួយគ្រួសារនោះមានអាការក្អួតចង្អោរ ឈឺក្បាល និងវិលមុខខ្លាំង ដោយភ្លាមៗត្រូវបានដឹកយកមកសង្គ្រោះនៅមន្ទីរពេទ្យបង្អែកស្រុក ក្រោយមក២នាក់ប្តីប្រពន្ធបានស្លាប់ពេលមកដល់មន្ទីរពេទ្យ ខណៈ៣នាក់ទៀតកំពុងសង្គ្រោះ និងសម្រាកព្យាបាល។

ប្រធានមន្ទីរសុខាភិបាល បានបញ្ជាក់ឱ្យដឹងថា មន្ត្រីជំនាញបានប្រមូលសំណាកសាច់ជ្រូកព្រៃមកពិនិត្យពិសោធន៍រកមូលហេតុដែលបណ្តាលឱ្យមនុស្សពុល និងបានណែនាំឱ្យពលរដ្ឋក្នុងភូមិបញ្ឈប់បរិភោគសាច់សត្វព្រៃ៕